الصفحة الرئيسية / اخبار عاجلة / قاتلة أطفالها من زوجها العرفي تفجر مفاجأة خلال التحقيقات

قاتلة أطفالها من زوجها العرفي تفجر مفاجأة خلال التحقيقات

فجرت قاتلة رضيعتيها بوضع السم لهما في ببرونات الرضاعة مفاجأة كبيرة خلال التحقيق معها؛ إذ أقرت أمام جهات التحقيق أن الطفلتين نتاج حملها من شخص آخر غير زوجها الذي كان محبوسًا وقت حملها.
وقالت المتهمة قمر، أمام جهات التحقيق المختصة في مركز شرطة الحسينية، إن زوجها كان محبوسًا في الوقت الذي حملت فيه في طفلتيها التوأم مكة ومليكة، وعقب حبس زوجها ذهبت للعيش مع والدها وزوجته، فزوّجها والدها عرفيًا من نجل زوجة والدها، ونتج عن ذلك حملها في ابنتيها، اللتين قتلتهما فيما بعد، بوضع السم لهما في الببرونات التي تُرضعهما بها.

وقفت المتهمة قمر خ أ ر، البالغة من العمر 18 سنة، أمام جهات التحقيق في مركز شرطة الحسينية، يوم الأول من شهر أبريل الماضي، تُدلي بتفاصيل الواقعة التي ارتكبتها في اليوم الأخير من شهر مارس المنصرم، وجاءت أقوالها كما يلي:
اللي حصل إن أنا متجوزة محمد ع أ ع من أربع سنوات، وبعد كده محمد جوزي اتحبس، ولما اتحبس أنا روحت قعدت في بيت أهلي في الإسماعلية، وهناك أبويا جوزني وأنا على ذمة محمد، وجوزي من ابن مراته اسمه صلاح خ ص، وقعدت معاه ثمانية أشهر وحملت، وبعد كده طفشت من البيت وروحت عند بيت جوزي الأولاني.
وتابعت: قعدت مع حماتي اللي اسمها كوثر م م ع، واسم الشهرة بتاعها كوثر أم شفه، وبان عليا الحمل وهي عرفت وقالت لي أنا هاحبس أهلك علشان جوزوکي وانتي على ذمة ابني، وبعدها جوزي الأولاني طلع من السجن وعرف وراح اتخانق مع أبويا ومسكوا في بعض، وبعد كده اتحبس تاني، وأنا خلفت مليكة ومكة وهو في السجن لأنه دخل تاني السجن، ولما خرج من السجن قال أنا هسجلهم باسمي لما نكتب رسمي علشان أنا كنت لسه مكملتش السن.

وأضافت: بعد كده أخدنا شقة إيجار أنا وجوزي محمد ع أ في الإسماعيلية في الكيلو 7 في عزبة أبو ناجي، ومن أسبوع حماتي جت لنا زيارة في الإسماعيلية، وكنا بنلم خردة هناك وهي معانا، وهي لقت كيس بتاع سم حشرات لونه أصفر موجود في الزبالة، وأخدته، وإمبارح أنا وجوزي جينا مع حماتي في الشقة بتاعتها في المساكن اللي عند مدرسة الصنايع في الحسينية في الشرقية، وبعد كده أنا شوفت الكيس بتاع السم في وسط اللبس بتاعها، ولما شوفته قولت لها أنا عاوزة السم علشان أرش بيه حوالين المرتبة اللي بنام عليها علشان الحشرات.

وأردفت: أخدته منها وروحت جايبة السم وحطيته في الببرونتين اللي بعمل فيهم اللبن بتاع أولادي وأرضعهم بيهم، وبعد ما حطيت السم روحت مرضعة العيال وكان جوزي نايم ومغطي وشه وما شافنيش وأنا بحط السم، وبعد ما شربتهم السم اللي أنا حطاه روحت قایمة وغاسلة الببرونات وحطيت فيها لبن علشان محدش يعرف حاجة.

واستطردت: جيت أرضع العيال تاني مرضيوش يرضعوا روحت سايباهم ونمت، ولما صحيت الصبح لقيت بنتي مكة ما بتطلعش نفس وميتة جنبي، ومليكة بتتحرك ومش بتعيط، وحماتي دخلت عليا الصبح تشوف العيال لقيت واحدة ميتة والتانية فيها الروح، وقالت لي تعالي نروح بيها المستشفى، ومكة اللي ماتت سيبناها في البيت مع جوزي لحد ما نرجع من المستشفى.

تابعت المتهمة حديثها أمام جهات التحقيق: لما روحنا المستشفى ملحقوهاش وماتت والحكومة خدتني أنا وحماتي على المركز، وأنا قعدت أقول لهم على حاجة ومرضيتش أقول لهم على البيت، علشان حماتي قالت لي ما تقوليش على البيت لأنهم هيلاقوا التانية ميتة هناك وهنتحبس، لكن في الآخر قولت على كل حاجة وروحت مع الحكومة على البيت ولقيوا جوزي ولقيوا مكة ميتة وشافوا كيس السم والببرونات، وجوزي كان رايح يجيب لبنتي مكة كفن ولما رجع خدوه معانا، وكان موجود واحد اسمه محمود بيشتغل مع حماتي وكان عاوز يتجوزها وخدوه معانا، وده كل اللي حصل.

شاهد أيضاً

تفاصيل جديدة في واقعة سقوط صيدلي من إحدى العقارات

كشفت التحريات الأولية، في واقعة سقوط صيدلي من الطابق الخامس ويدعى ولاء زايد، تفاصيل جديدة، …

مرتضى منصور يقرر منع دخول لاعب الزمالك السابق هو وأسرته من دخول النادي

قرر المستشار مرتضى منصور، منع أسرة أمير عبد العزيز لاعب الفريق السابق، من دخول نادي …

صرصار يعلق على هجوم والده على الفنان سعيد صالح

علق الفنان مراد فكري صادق، على الهجوم الذي تعرض له والده الفنان فكري صادق، بعد …

الرئيس الأمريكي جو بايدن يعيد نفس تصريحاته قبل الغزو الروسي ل أوكرانيا مرة أخرى حول الهجوم الصيني ل تايوان

أكد الرئيس الأمريكي جو بايدن أن بلاده ستدافع عن تايوان، في حال تعرضت لغزو عسكري …

تعرف على أسعار الدولار فى البنوك المصرية اليوم السبت

الدولار استقر مقابل الجنيه المصري في ختام تعاملات اليوم السبت، 17 سبتمبر 2022، حيث يوافق …